Професионализмот е дефиниран како вештина, квалитет и компетентност за извршување одредена работа. Работата како дадилка е професија. И покрај тоа, денес сѐ уште постои огромен јаз помеѓу вреднувањето на професијата дадилка и одговорноста да се работи истата. Личноста која ја избрала професијата дадилка за своја животна работа и кариера, сака да работи само со деца и во тоа единствено се пронаоѓа е професионална дадилка.

Доколку сакате да бидете професионална дадилка, следете ги четирите основни чекори кои можат Ви помогнат полесно да се профилирате за оваа работна позиција:

Стекнете искуство во чување деца
Обезбедете препораки од претходни искуства
Учествувајте во обуки кои се поврзани со детскиот развој и безбедност
Изградете позинивни карактерни особини и квалитети
Создадете професионалнa и ажуриранa биографија, CV или профил

Поголемо работно искуство е еднакво на поголема професионалност. Стекнете што е можно повеќе работни часови со деца. Тоа може да биде преку дневна или вечерна грижа за деца, подучување на деца, волонтерска работа со деца или стекнување со лично искуство како родител. Ваквите активности ќе ја зголемат Вашата компетентност во однос на чување, грижа и нега на деца. Додека градите искуство потребно е да собирате и препораки од семејствата во кои сте работеле, центрите или училиштата. Точни, ажурирани и потврдени препораки ќе стават печат на вашата професионалност.

Обуките кои се спроведуваат од специјализирани установи Ви нудат непроценливо знаење и стекнување на практични вештини. Стекнат сертификат за педијатриска прва помош, за грижа и нега на новороденче или сертификат за работа со деца со посебни потреби претставува важна потврда за Вашата професионалност. Покрај тоа, возачка дозвола и добро познавање на странски јазици се вештини кои секако се добредојдени во Вашата биографија. Професионалната дадилка и покрај сите сертификати со кои се очекува да се стекне, пред сѐ треба да биде правилно изградена личност која сака да учи нови работи и да напредува. Работата на себе е способност која ја поседува секој од нас, но не секој има желба да се развива во позитивна насока. Поголемиот дел на родители сметаат дека трпеливоста е прва најважна особина на што треба да ја поседува секоја дадилка. Професионалната дадилка треба да има трпеливост, добра комуникација со родителите и останатите членови на семејството, и да изгради взаемна доверба и соработка.

Професионалната биографија или CV треба да ве отсликува Вас, Вашето искуство и способности. Вашето CV треба гласно и јасно да ја истакне Вашата вредност како потенцијална квалификувана дадилка. И оваа вредност мора да се каже во само неколку секунди, бидејќи во деловниот свет, тоа е целото внимание што едно CV го добива. Овој документ е Вашата патна дозвола да влезете во светот на вработувањето. Како што се вели дека првиот впечаток е најважен, така Вашето CV е прв впечаток што го оставате кај потенцијалниот работодавач. Тоа има моќ да Ви ги зголеми или уништи шансите за интервју. Пред да го испратите Вашето CV, прилагодете го за работата за која аплицирате, ажурирајте дополнителни информации и задолжително проверете печатни грешки.

Барање работа преку Babysittingmk.com платформата

Избирање на вистинскиот работен ангажман претставува важна одлука за секоја професионална дадилка. Работа како дадилка во добро семејство значи почит и разбирање, редовна и соодветна плата, долгорочен ангажман, наградување и можност за зголемување на месечниот надоместок, платено професионално надоградување, користење на слободни денови, платен годишен одмор. Вас Ви треба соработка со сериозни семејства, односно родители кои знаат што бараат, но истовремено се подготвени соодветно да ги вреднуваат трудот, посветеноста и професионалноста на својата дадилка.

Една од можностите за барање на работа е и Babysittingmk.com. Babysittingmk.com е платформа каде што регистрираните корисници - дадилки имаат голем број на поволности и бенефиции, како и можност да бидат претставени на голем број на семејства и родители. Регистрираните корисници на платформата имаат можност да креираат посебен кориснички профил и да ги додадат своите биографија, дипломи, достигнувања, препораки и сè она со што профилот ќе стане репрезентативен за семејствата кои имаат потреба од услуги за грижа и нега на деца. На тој начин ќе го зајакнете Вашиот професионален идентитет и ќе имате пристап до отворени работни понуди од семејства, што значи поголем избор за Вас и полесно пронаоѓање на добар работен ангажман.

Интервју

Интервјуто е клучна средба од која зависи дали Вие ќе го добиете посакуваната работна понуда. За интервјуто да биде направено на најдобар можен начин, потребно е да ги следите советите за однесување и тоа пред, после и за време на личната средба со семејството.

Пред интервју

Уште еднаш погледнете ја понудата за која треба да имате интервју. Потребно е да сте информирани за работно место за кое сте пријавени и добро да ги знаете барањата на семејството.
Облечете се соодветно. Одите на интервју за работа и потребно е да се облечете професионално. Кошула, блуза, пантолони и здолниште се соодветна облека за интервју. Не е пожелно на интервју да се прикажете во патики, тренерки, куси здолништа, искинати фармерки и хеланки.
Тргнете на време од дома. Доцнењето на интервју остава негативен впечаток на семејството и ги намалува Вашите шанси за добивање на работен ангажман. Во исклучителна ситуација, доколку сепак задоцните извинете им се на родителите.

За време на интервју

Задолжително исклучете го мобилниот телефон пред да влезете на интервју.
Кога ќе се сретнете со семејството, задолжително се ракувате со родителите. Откако разговорот ќе заврши, исто така уште еднаш се ракувате со родителите. Тоа зборува за Вас и Вашето однесување.
Претставете се со неколку реченици за себе и наведете зошто сакате да ја работите професијата. Посочете го Вашето образовани и доколку имате наведете стекнати сертификати, познавање странски јазици и возачката дозвола. Потоа објаснете го Вашето работно искуство со деца.
Во текот на интервјуто разговарајте со семејството за работи поврзани со ангажманот. Не навлегувајте во детали како што се: во која точно улица живее семејство, што работат, зошто бараат дадилка, дали се од Скопје и слично. Покажете интерес за детето и прашајте ги родителите за информации поврзани со него како на пример: како се вика детето, кои му се омилени играчки, што јаде, какви активности најмногу практикува во моментот, колку пати спие, дали има алергии.
На поставените прашања одговарајте искрено, прецизно и конкретно. Доколку на пример, семејството Ве праша дали сте флексибилни во однос на работно време, одговорете согласно на Вашите можности: сум флексибилна и можам повремено да дојдам навечер или во сабота, или не сум флексибилна во тој поглед.
Не прифаќајте обврски или услови кои што не можете или не сакате да ги исполните. Не смеете на интервју да изјавите дека прифаќате понекогаш да работите и во сабота, а после интервју да се премислите и да го известите семејството дека сепак не би можеле да работите во сабота.
Согласно барањата на семејството јасно и гласно изјаснете се за Вашите очекувања на месечно ниво. Не правете грешка со барање од нив да дадат понуда за плата. Ценете си го својот труд и работа и слободно кажете што сметате дека заслужувате.

После интервју

Почекајте семејството да Ве извести за донесената одлука. Не им телефонирајте на родителите за да дознаете каков е нивниот избор пред да измине периодот во кој треба да Ве известат. Тоа покажува дека сте несигурни во себе и своите квалитети. Ако не бидете избрана во тоа семејство, ќе пронајдете и друго соодветно семејство. Самодовербата е важен дел во добивањето успешен работен ангажман. Цврсто веруваме дека со соодветно однесување за време на средбата со семејството, Вашите очекувањата ќе бидат реализирани. Се надеваме дека во наредниот период Ќе ги примените нашите совети со цел реализација на Вашите желби за професионален и сигурен работен ангажман.

Ангажирање и договор

Конечно по завршените интервјуа го пронајдовте Вашето семејство и детето за кое ќе се грижите. Се чувствувате добро и возбудено! Но, има уште неколку работи што треба да ги направите во соработка со родителите пред да започнете со ангажманот. За да обезбедите сигурен почеток и добар тек на ангажманот, потребно е да ги прецизирате сите детали од работниот однос, вклучувајќи ги работните обврски, паузите, годишниот одмор, дополнителните часови, начинот на ангажирање, начинот на исплата. Сите договорени детали се дел од договорот со семејството, кој секако треба да е во писмена форма. Постоењето на договор е клучно за долгорочен успех на Вашиот однос – кога се појавуваат предизвици, нови моменти, недоразбирања договорот е тој што ќе ги држи двете страни во реалноста. Се разбира дека без постоење на цврста намера и желба за соработка ниту еден договор нема да помогне, но токму затоа договорот е еден вид на сигурност за двете страни.

Договорот со семејството треба да го опфати следното:

Сите Ваши работни обврски
Работно време и работни денови
Годишен одмор
Начин и датум на исплата на надоместок
Надомест за прекувремено работење и/или грижа и нега на повеќе деца
Куќни правила
Начин на завршување и/или раскинување на договор

Потребно е да се запознаете и со законската рамка со која е регулирана дејноста на негувателките и дадилките во која работите. Ова ќе ви го олесни формулирањето на договорот и прецизирањето на елементи од истиот. Доколку имате потреба од советодавна поддршка при подготовка на договорот нашите консултанти можат да Ви помогнат околу прецизирање на деталите. Подготовка за почеток За успешен и лесен почеток потребно е да се подготвите. Во прилог прочитајте ги завршните насоки кои ќе Ви помогнат во подготовката за почетокот.

Во зависност од возраста на детето, пожелно е да ја подготвите првата средба со него и да го осмислите Вашиот пристап. На пример: можете да му купите боенка или сликовница и да му ја подарите на првата средба. На тоа начин ќе ќе овозможите детето побрзо да се опушти во Ваше присуство. Без разлика дали станува збор за бебе или поголемо дете, секако е добро да имате период на адаптација заедно со еден од родителите. Така полесно ќе навлезете во секојдневната рутина која веќе е воспоставена, ќе го запознаете домот и неговата организација, а детето постепено ќе Ве прифати како нова личност и ќе се навикне на Вас.

За работа со детето секогаш користете чиста, комотна облека која ќе ја облекувате кога ќе пристигнете во домот на семејството. Во договор со родителите истата може да престојува во домот или да ја носите со себе.

Побарајте насоки и упатства од семејството во однос на телефонски броеви и лица за контакт во случај на потреба и итност, безбедност и сигурност во домот, куќни правила, каде се наоѓаат евентуални лекови и нивна примена.

Разговарајте со родителите, бидејќи комуникацијата е клучна за успешен ангажман. Пожелно е да имате редовна, секојдневна комуникација во која ќе може да ги пренесете сите битни информации за детето и како поминале работните активности.

Честитки! Сега кога знаете како да дојдете до Вашите посакувани работни ангажмани како дадилка, останува уште еден чекор: Зачленете се на Babysittingmk.com платформата и изберете кое ќе биде наредното среќно семејство во кое ќе работите!